बथनाहामा ओम शान्ति आश्रम द्वारा कृष्ण जन्माष्टमी महोत्सवको भव्य उद्घाटन

लहान, साउन २९ । सिरहा जिल्लाको लहान नगरपालिका स्थित ओम शान्ति आश्रम, बथनाहामा यस वर्षको कृष्ण जन्माष्टमी महोत्सव धार्मिक जोश र भक्ति भावनासहित सुरु भएको छ। उद्घाटन कार्यक्रम माननीय राजकुमार गुप्ताको प्रमुख आतिथ्य तथा जिल्ला समन्वय समिति (जिसस) प्रमुख दिनेश महतोको विशिष्ट आतिथ्यमा सम्पन्न भयो।

उद्घाटनको औपचारिकतापछि आश्रम परिसरबाट भव्य कलश यात्राको सुरुवात गरिएको थियो। कलश यात्रामा स्थानीय महिला, पुरुष, बालबालिका तथा विभिन्न धार्मिक संघ–संस्थाका प्रतिनिधिहरू सहभागी बनेका थिए। सहभागीहरू परम्परागत वेशभूषा र धार्मिक ध्वजासहित, भजन–कीर्तन, बाजागाजासँगै नगर परिक्रमा गर्दै भक्तिमय वातावरण सिर्जना गरे। मार्गभरि स्थानीय बासिन्दाले फूलमाला, अक्षता र प्रशादद्वारा कलश यात्राको स्वागत गरे।

ओम शान्ति परिवारका संयोजकहरूका अनुसार महोत्सव २ भदौसम्म चल्नेछ। यस अवधिमा आश्रम प्राङ्गणमा दैनिक रूपमा धार्मिक प्रवचन, भजन–कीर्तन, योग तथा ध्यान सत्र, गिता वाचन प्रतियोगिता लगायतका कार्यक्रम हुनेछन्। विशेषगरी कृष्ण जन्माष्टमीको दिन राति १२ बजे कृष्ण जन्म आरती, मखना, मिश्री र तुलसीका पातको विशेष भोग चढाइने तथा भक्तजनहरूबीच प्रशाद वितरण गरिनेछ।
महोत्सवमा धार्मिक कार्यक्रमसँगै सांस्कृतिक प्रस्तुति पनि राखिएको छ, जसअन्तर्गत स्थानीय कलाकार, विद्यार्थी तथा धार्मिक समूहहरूले नृत्य–नाटिका, कृष्ण–राधा झाँकी तथा भक्ति गीत प्रस्तुत गर्नेछन्। आयोजकको भनाइअनुसार, यी गतिविधिहरूले धार्मिक मात्र होइन, सांस्कृतिक एकता र सामाजिक सद्भावलाई पनि प्रवर्द्धन गर्नेछन्।

उद्घाटन कार्यक्रममा बोल्दै माननीय राजकुमार गुप्ताले कृष्ण जन्माष्टमीले समाजमा सत्य, धर्म र अहिंसाको सन्देश फैलाउने बताए। उनले ओम शान्ति आश्रमजस्ता संस्थाहरूले धार्मिक–सांस्कृतिक चेतना अभिवृद्धिमा महत्त्वपूर्ण योगदान दिइरहेको उल्लेख गर्दै यसप्रकारका महोत्सवलाई निरन्तरता दिनुपर्नेमा जोड दिए। त्यस्तै, जिसस प्रमुख दिनेश महतोले धार्मिक तथा सांस्कृतिक कार्यक्रमहरू समुदायबीच एकता र सहकार्यको माध्यम बन्न सक्ने बताए।

कार्यक्रममा स्थानीय जनप्रतिनिधि, सामाजिक अगुवा, धार्मिक विद्वान, पत्रकार, महिला समूह, युवा क्लब तथा शान्ति प्रेमी नागरिकहरूको उल्लेखनीय उपस्थिति रहेको थियो। आयोजक समितिले भक्तजनलाई अनुशासन, स्वच्छता र धार्मिक मर्यादा पालन गर्दै महोत्सवमा सहभागी हुन आग्रह गरेको छ।