मिटर ब्याजि पिडितले अदालत गेटको अगाडि नाराबाजी

तराई फिलिक्स सम्बादाता
२१ गते चैत्र शुक्रबार

शम्भुनाथ नगरपालिका–३ कचानादाहाकी पशुपति कुमारी चौधरी आफ्नो जग्गा फिर्ताको माग गर्दै संघर्षमा उत्रिएकी छन्। उनका सासु संसार देवी चौधरीले २०६३ सालमा ४० हजार रुपैयाँ ऋण लिएकी थिइन्। सो रकमको सट्टामा साढे ९ कट्ठा जग्गा नामसारी गरिदिने सहमति भए पनि साहु नन्दुलाल चौधरीले हालसम्म जग्गा फिर्ता दिएका छैनन्।

पीडित चौधरीका अनुसार ऋण तिर्ने प्रक्रिया पटक–पटक पूरा गर्दा पनि साहुले जग्गा फिर्ता गर्न अस्वीकार गरे। यो विवाद कानुनी प्रकृयामा प्रवेश गरेपछि प्रहरीले नन्दुलाल चौधरीलाई नियन्त्रणमा लिएको थियो। तर, अदालत समक्ष पेश गरिएपछि उनले जग्गा फिर्ता गर्न अस्वीकार गरेपछि पीडित पक्ष थप आक्रोशित बनेका छन्।
बिहीबार राजविराज जिल्ला अदालतमा थुनछेक बहस चलिरहँदा ऋणी पशुपति चौधरी, सहिर मिटरब्याजी संघर्ष समितिकी पुनम कुमारी महतोसहित अन्य पीडित तथा किसानहरूले विरोध प्रदर्शन गरे। ‘सम्पूर्ण किसान–मजदुर एक होऔँ! वित्तीय शोषण तथा उत्पीडनविरुद्ध संघर्ष गरौँ!!’ भन्ने नारा लगाउँदै प्रदर्शनकारीहरूले नन्दुलाल चौधरीविरुद्ध कानुनी कारबाहीको माग गरे।

मिटरब्याजविरुद्ध किसान आन्दोलन नेपालका अगुवाहरूले समेत यस आन्दोलनलाई समर्थन जनाउँदै, पीडितहरूको पक्षमा ऐक्यबद्धता प्रकट गरेका छन्। आन्दोलनकारीहरूले अविलम्ब जग्गा फिर्ता गर्न माग गर्दै अदालत अगाडि प्रदर्शन गरे। उनीहरूले साहुले गरेको अन्यायको विरुद्ध आवाज उठाउने क्रममा प्रशासन र न्यायालयको ध्यानाकर्षण समेत गराएका छन्।
विरोध प्रदर्शनमा सहभागी किसान तथा मजदुरहरूले मिटरब्याजीहरूको ज्यादती अन्त्य गर्न सरकारलाई दबाब दिनुपर्ने बताए। ‘हामी मिटरब्याजको जालमा फसेका छौं, सरकारले यसमा ध्यान नदिए हामी अझै सशक्त आन्दोलन गर्न बाध्य हुनेछौं,’ प्रदर्शनमा सहभागी चौधरी भने।

यसबीच, जिल्ला अदालत राजविराजमा साहु नन्दुलाल चौधरीको पक्षबाट वकिलहरूले बहस गरिरहेका छन् भने पीडित पक्षले आफ्नो अधिकारको लडाइँ जारी राखेका छन्। उक्त विरोध प्रदर्शन शान्तिपूर्ण रूपमा सम्पन्न भएको भए पनि पीडित पक्षले आफ्नो माग सम्बोधन नभए अझै सशक्त आन्दोलन गर्ने चेतावनी दिएका छन्। किसान आन्दोलन नेपालका नेता तथा अन्य सरोकारवालाहरूले समेत यस विषयलाई गम्भीरताका साथ लिँदै सरकारलाई तत्काल कदम चाल्न आग्रह गरेका छन्।

पीडित पक्षको भनाइअनुसार, मिटरब्याजको कारण धेरै किसान तथा सर्वसाधारणले आफ्नो सम्पत्ति गुमाउनु परेको छ। ‘हामी ऋण तिर्दा तिर्दै पनि साहुको शोषणमा परिरहेका छौं, अब हामी चुप लागेर बस्दैनौं,’ आन्दोलनकारीले भने।
यस घटनाले मिटरब्याज समस्या झनै सतहमा ल्याएको छ। यसैकारण सम्बन्धित निकायहरूले शीघ्र समाधान खोज्नुपर्ने आवश्यकतामा बल पुगेको छ। कानुनी रूपमा पीडितहरूलाई न्याय दिलाउन प्रशासन, अदालत र सरकारको ठोस पहल आवश्यक देखिन्छ। यदि पीडितको माग सम्बोधन नभएमा आन्दोलन अझ चर्कने सम्भावना देखिन्छ।