भगवानपुर गाउँपालिकाको १३ औं गाउँसभा सम्पन्न, कति बजेट पालिकामा?
लहान, असार ११ । भगवानपुर गाउँपालिकाको १३औं गाउँसभा भव्य रुपमा सम्पन्न भएको छ। गाउँसभामा अध्यक्ष यादवले आर्थिक वर्ष २०८२/८३ का लागि कुल ४८ करोड ४४ लाख ३१ हजार ९४७ रुपैयाँको बजेट प्रस्तुत गरेका छन्। बजेटमा पूर्वाधार, शिक्षा, स्वास्थ्य, कृषि तथा सामाजिक सुरक्षालाई प्राथमिकता दिइएको छ। गाउँसभामा नीति, कार्यक्रम तथा बजेटसम्बन्धी प्रस्तावहरू पारित गरिँदै स्थानीय विकासमा जोड दिइएको छ। जनप्रतिनिधि, कर्मचारी, नागरिक समाज र स्थानीयबासीको उपस्थिति रहेको सभा शान्तिपूर्ण र सफल भएको गाउँपालिकाले जनाएको छ। बजेट पारदर्शी र कार्यान्वयनमुखी हुने प्रतिबद्धता समेत व्यक्त गरिएको छ।
उहाँले गाउँपालिका भित्रका सर्वसाधारणको जीवनस्तर सुधार गर्ने लक्ष्यसहितका योजनालाई बजेटमा समेटिएको जानकारी दिनुभयो ।
आगामी आर्थिक वर्षका लागि अनुमानित चालु खर्च ३० करोड ९९ लाख ९५ हजार ९४७ रुपैयाँ रहनेछ भने पूँजीगत खर्चतर्फ १७ करोड ४४ लाख ३६ हजार रुपैयाँ विनियोजन गरिएको छ । बजेटको श्रोत पक्षमा प्रमुख रूपमा ३५ करोड ९ लाख ३१ हजार ९४७ रुपैयाँ अन्तरसरकारी वित्तीय हस्तान्तरणबाट आउने अनुमान गरिएको छ ।त्यसैगरी, आन्तरिक आय ३ करोड ३५ लाख, चालु आर्थिक वर्षको अनुमानित बैंक मौज्दात ३ करोड, संघीय सरकारबाट प्राप्त राजस्व बाँडफाँड ८ करोड ४ लाख ९७ हजार ८२७, प्रदेश सरकारबाट ४१ लाख ९८ हजार १२० रुपैयाँ राजस्व बाँडफाँडबाट प्राप्त हुने जनाएको छ ।
नेपाल सरकारबाट प्राप्त सामान्यीकरण अनुदान ८ करोड ५८ लाख, सम्पूरक अनुदान १ करोड ६८ लाख, सशर्त अनुदान (चालु) १२ करोड १८ लाख, सशर्त अनुदान (पूँजीगत) ६५ लाख, विशेष अनुदान १ करोड ६५ लाख रहेका छन् । प्रदेश सरकारबाट प्राप्त हुने सामान्यीकरण अनुदान ५८ लाख ३६ हजार, सशर्त अनुदान ८० लाख, सम्पूरक अनुदान २० लाख, विशेष अनुदान ३० लाख र सामाजिक सुरक्षा भत्ता शीर्षकमा १० करोड ४४ लाख ३१ हजार ९४७ रुपैयाँ बजेटमा समावेश गरिएको छ ।
अध्यक्ष यादवका अनुसार चालु आर्थिक वर्षमा भगवानपुर बजार क्षेत्रको अतिक्रमण हटाएर सुन्दर बजार विकास गरिएको छ । अतिक्रमित जग्गा खाली गरी नगरको सौन्दर्य बढाउने योजना कार्यान्वयनमा आएको छ ।
त्यसैगरी, २५ सय मीटर ग्राभेल सडक स्तरउन्नति तथा निर्माण सम्पन्न भएको छ भने ४२१ मीटर आरसीसी ढलान सडक, ४ वटा मन्दिर, र एउटा पोखरीको जीर्णोद्धार कार्य पनि सम्पन्न गरिएको जानकारी गराइयो । गाउँपालिकाले हाल ५६३ मीटर आरसीसी ढलान सडक निर्माण कार्य चालु वर्ष भित्र सम्पन्न गर्ने योजना बनाएको छ । त्यसैगरी, ३७ सय मीटर ग्राभेल सडक र १९ सय मीटर कृषि सडक निर्माणाधीन अवस्थामा रहेको जनाइएको छ ।
अध्यक्ष यादवका अनुसार, २ वटा विद्यालय भवन, २ स्वास्थ्य चौकी, ९ वटा ह्युम पाइप जडान, २ वटा कल्भर्ट, ३ मन्दिर निर्माण, तथा २ वटा पोखरी सौन्दर्यीकरण कार्य पनि कार्यान्वयनको क्रममा छन् । यी सबै योजनाहरू गाउँपालिकाको दीगो विकास र स्थानीय जनताको जीवनस्तरमा सुधार ल्याउने उद्देश्यले अगाडि बढाइएको बताइएको छ । गाउँपालिकाले आगामी वर्षमा शैक्षिक गुणस्तर सुधार, किसानमुखी कृषि कार्यक्रम, स्वास्थ्य सेवामा पहुँच वृद्धि, स्थानीय रोजगारी सिर्जना र पूर्वाधार निर्माणलाई प्राथमिकतामा राख्दै विभिन्न सामाजिक विकासका कार्यक्रमलाई अगाडि बढाउने बताएको छ ।
अध्यक्ष यादवले पारदर्शी, उत्तरदायी र नागरिकमुखी शासन प्रणालीमार्फत विकास योजनाहरू समयमै कार्यान्वयन गरिने प्रतिबद्धता व्यक्त गर्नुभयो ।