लहान नगरपालिका-१३ मा अस्थायी प्रहरी चौकीको नयाँ भवन उद्घाटन

लहान, २५ असार । लहान नगरपालिका-१३ पक्कीटोलमा निर्माण सम्पन्न भएको अस्थायी प्रहरी चौकीको पक्की भवन  उद्घाटन गरिएको छ। लहान नगरपालिकाका प्रमुख महेशप्रसाद चौधरी, मधेश प्रदेश प्रहरी प्रमुख डिआईजी उमाप्रसाद चतुर्वेदी र प्रमुख जिल्ला अधिकारी विश्वप्रकाश अर्यालले संयुक्त रूपमा भवन उद्घाटन गर्नुभयो।

उक्त कार्यक्रमको प्रमुख आकर्षण स्थानीयवासीको सक्रिय सहभागिता रह्यो।
नगरप्रमुख महेश चौधरीले उद्घाटन समारोहमा बोल्दै शान्ति सुरक्षाको सुदृढीकरणमा स्थानीय समुदायको ऐक्यबद्धता र योगदानलाई उदाहरणीय कार्यको रूपमा उल्लेख गर्नुभयो। उहाँले भन्नुभयो, “स्थानीय युवा आश्विन कुमार राउतको नेतृत्वमा समुदायबाट संकलित चन्दाबाट दुई कठा जग्गा खरिद गरी भवन निर्माण गरिएको छ। यो सच्चै नै अनुकरणीय र प्रेरणादायी कार्य हो।”

स्थानीय अभियन्ता आश्विन कुमार राउतले प्रहरी सेवाको पहुँचलाई नजिक ल्याउने उद्देश्यले समुदायमा घरदैलो अभियान चलाएर चन्दा सङ्कलन गर्नुभएको थियो। चन्दा संकलनबाट प्राप्त रकमले जग्गा खरिद गरी करिब ८ लाख रुपैयाँ लागतमा पक्की भवन निर्माण गरिएको हो। अब भवन प्रयोगमा आएपछि प्रहरी चौकीलाई व्यवस्थित रूप दिइने र सेवाप्रवाहमा सहजता आउने विश्वास लिइएको छ। उद्घाटन समारोहमा बोल्दै मधेश प्रदेश प्रहरी प्रमुख डिआईजी उमाप्रसाद चतुर्वेदीले यस्तो पहलले प्रहरी र समुदायबीचको सम्बन्ध अझ प्रगाढ हुने बताउनुभयो। उहाँले भन्नुभयो, “समुदायले प्रहरीका लागि पूर्वाधार बनाइदिनु भनेको विश्वासको प्रतिक हो। हामी समुदायको मर्म बुझेर सेवामा अझ इमान्दार हुनेछौँ।” साथै यस अस्थायी प्रहरी चौकी पक्की टोलमा स इ को दरबन्दी दिनुपर्छ र कम्तीमा १८ देखि २५ जनाको टोलि राख्नु पर्छ।

सिरहाका प्रमुख जिल्ला अधिकारी विश्वप्रकाश अर्यालले पनि समुदायको सक्रिय सहभागिताको खुलेर प्रशंसा गर्नुभयो। उहाँले भन्नुभयो, “समाज परिवर्तन समुदायबाटै सम्भव हुन्छ। यस्तो उदाहरणले अन्य ठाउँलाई पनि प्रेरणा दिनेछ।” अन्य वक्ताहरू र सहभागिता उक्त कार्यक्रममा वडा नम्बर १३ का अध्यक्ष, स्थानीय समाजसेवी, सुरक्षाकर्मी, महिला समूह, पत्रकार, शिक्षक र विभिन्न राजनीतिक दलका प्रतिनिधिहरूको उपस्थिति रहेको थियो। सबै वक्ताहरूले समुदाय-प्रहरी साझेदारीले शान्ति सुरक्षा र सामाजिक अनुशासन सुदृढ बनाउनेमा जोड दिएका थिए।

लहान नगरपालिका-१३ पक्कीटोलमा समुदायको सक्रिय सहभागितामा निर्मित अस्थायी प्रहरी चौकीको नयाँ भवन उद्घाटन हुनु, प्रहरीप्रति बढ्दो जनविश्वास र स्थानीय पहलकदमीको सफल उदाहरण बनेको छ। यसले स्थानीय तहमा सुरक्षा प्रवाह र आपराधिक गतिविधि नियन्त्रणमा प्रभावकारी भूमिका खेल्ने अपेक्षा गरिएको छ।