एनसीसी जूनियर डिभिजन छात्र–छात्रालाई पोशाक तथा खेलकुद सामग्री वितरण
लहान असोज ३ । नेपाली सेनाको सहयोगमा श्री जनता नमूना प्रविधिकधार माध्यमिक विद्यालय सोनबर्षाले आयोजना गरेको विशेष कार्यक्रममा एनसीसी (नेशनल क्याडेट कोर) जूनियर डिभिजनमा छनोट भएका छात्र–छात्राहरुलाई खेलकुद सामग्री तथा अभ्यासका लागि आवश्यक पोशाक वितरण गरिएको छ ।
शुक्रबार सम्पन्न कार्यक्रममा प्रमुख अतिथिका रूपमा उपस्थित नवराजपुर गाउँपालिका अध्यक्ष शिव उदगार यादव (शिवा) ले छात्र–छात्राहरुलाई बधाई तथा शुभकामना दिँदै उच्च मनोबल, अनुशासन र राष्ट्रप्रेमको महत्वबारे विशेष मन्तव्य राख्नुभयो । अध्यक्ष यादवले एनसीसी अभ्यासमार्फत आत्मविश्वास, आत्मरक्षा, नेतृत्व क्षमता र राष्ट्रिय भावना अझ सबल हुने विश्वास व्यक्त गर्दै विद्यार्थीहरूलाई खुकुरी ड्रिल अभ्यासलाई जीवनपथमा अनुशासन र समर्पणसहित अगाडि बढाउने प्रेरणा दिनुभयो ।
“आजका वीर कदमहरूले भोलिको सशक्त नेतृत्व निर्माण गर्नेछन्, विद्यार्थीहरूले अनुशासन र राष्ट्रप्रेमलाई साथ लिएर आफ्नो भविष्य उज्यालो बनाउनुपर्छ,” उहाँले भन्नुभयो । यसै अवसरमा अध्यक्ष यादवले विद्यालयका तर्फबाट एनसीसी छनोट भएका छात्र–छात्राहरुलाई खेलकुद सामग्री र तालिमका लागि आवश्यक पोशाक हस्तान्तरण गर्नुभयो ।
कार्यक्रममा विद्यालय व्यवस्थापन समितिका पदाधिकारी, शिक्षक, अभिभावक तथा विद्यार्थीहरूको उल्लेख्य उपस्थिति थियो । विद्यालयका प्राचार्यले कार्यक्रममा स्वागत मन्तव्य राख्दै नेपाली सेनाको सहकार्यमा यस किसिमको कार्यक्रमले विद्यालयस्तरमै सैनिक तालिम र अनुशासनबारे सचेतना बढाएको बताउनुभयो । उहाँले विद्यार्थीहरूको शारीरिक, मानसिक र बौद्धिक विकासमा एनसीसी अभ्यासले ठूलो टेवा पुर्याउने विश्वास व्यक्त गर्नुभयो ।
कार्यक्रममा उपस्थित विद्यार्थीहरूले खुकुरी ड्रिल अभ्यास प्रदर्शन गर्दै आत्मविश्वास र अनुशासनको सन्देश प्रवाह गरे । उनीहरूले एनसीसी अभ्यासले आफूहरूलाई राष्ट्रिय सेवा र नेतृत्व क्षमतामा सुदृढ बनाउने बताए । नेपाली सेनाको सहयोगमा सञ्चालन हुने एनसीसी कार्यक्रमले विद्यालयस्तरीय विद्यार्थीलाई राष्ट्रप्रेम, स्वअनुशासन, आत्मरक्षा र सामाजिक नेतृत्वतर्फ प्रेरित गर्दै आएको छ । यसरी छात्र–छात्रालाई आवश्यक पोशाक तथा खेलकुद सामग्री वितरणसँगै विद्यालय समुदायमा उत्साह थपिएको छ ।
कार्यक्रम समापनको क्रममा प्रमुख अतिथि अध्यक्ष यादवले एनसीसी अभ्यासलाई निरन्तरता दिन विद्यार्थीहरूलाई प्रेरित गर्दै भविष्यमा यस किसिमका गतिविधिहरूलाई गाउँपालिकाले पनि सहयोग गर्ने प्रतिबद्धता जनाउनुभयो । यसरी सम्पन्न कार्यक्रममा सहभागी सबैले विद्यार्थीहरूको अनुशासन, आत्मबल र राष्ट्रप्रेम अभिवृद्धिमा विद्यालय र स्थानीय सरकारबीचको सहकार्यलाई आवश्यक रहेको धारणा राखेका थिए ।