जसपा नेपाल सिरहा क्षेत्र नं. १ बाट सत्य नारायण यादवको एकल नाम प्रत्यक्ष उम्मेदवारमा सिफारिस

लहान पुस ०१ । जनता समाजवादी पार्टी (जसपा) नेपाल, सिरहा जिल्ला निर्वाचन क्षेत्र नं. १ का क्षेत्रीय कार्यकर्ताहरूको भेला सम्पन्न भएको छ। भेलाले आगामी प्रतिनिधिसभा निर्वाचनका लागि निर्वाचन क्षेत्र नं. १ बाट जसपा नेपालतर्फ प्रत्यक्ष उम्मेदवारका रूपमा सत्य नारायण यादवलाई एकल नाममा सिफारिस गर्ने निर्णय गरेको छ।

क्षेत्रीय स्तरमा आयोजित उक्त भेलामा जसपा नेपालका जिल्ला तथा क्षेत्रीय नेताहरू, अगुवा कार्यकर्ता र पार्टी समर्थकहरूको उल्लेखनीय सहभागिता रहेको थियो। भेलामा संगठनको वर्तमान अवस्था, राजनीतिक परिस्थितिको समीक्षा तथा आगामी निर्वाचन रणनीतिबारे विस्तृत छलफल गरिएको थियो।

छलफलका क्रममा वक्ताहरूले सत्य नारायण यादव क्षेत्र नं. १ मा पार्टीको नीति, सिद्धान्त र एजेन्डालाई प्रभावकारी रूपमा अगाडि बढाउन सक्षम, अनुभवी र जनतासँग गहिरो सम्बन्ध भएको नेता भएको धारणा व्यक्त गरे। उहाँले लामो समयदेखि सामाजिक न्याय, समावेशी लोकतन्त्र, मधेसी अधिकार, किसान, मजदुर, महिला तथा युवाका मुद्दामा निरन्तर आवाज उठाउँदै आएको भन्दै कार्यकर्ताहरूले एकमतले समर्थन जनाएका थिए।

भेलाले क्षेत्र नं. १ मा जसपा नेपाललाई बलियो राजनीतिक शक्ति बनाउने उद्देश्यसहित संगठन विस्तार, जनसम्पर्क अभियान तीव्र बनाउने तथा पार्टीका कार्यक्रम गाउँ–टोलसम्म पुर्‍याउने निर्णय पनि गरेको छ। साथै, पार्टीभित्रको एकता सुदृढ गर्दै आगामी निर्वाचनमा जसपा नेपालका उम्मेदवारलाई विजयी गराउन सबै कार्यकर्ता अनुशासित र सक्रिय रूपमा लाग्ने प्रतिबद्धता जनाइएको छ।

भेलाको अन्त्यमा सहभागी कार्यकर्ताहरूले जसपा नेपालले उठाउँदै आएको सामाजिक न्याय, समानता, पहिचान र सुशासनको एजेन्डालाई जनतामाझ प्रभावकारी रूपमा स्थापित गर्दै सिरहा क्षेत्र नं. १ बाट सत्य नारायण यादवलाई विजयी गराउने साझा संकल्प व्यक्त गरेका छन्।